Mike nagpatabang aron 'limpyohan' ang City Hall
Cebu - Nagplano karon si acting Mayor Michael Rama pagpakigtagbo sa kadagkuan sa print ug broadcast media sa Sugbu.
Partikular na niini ang mga opisyal sa Kapisanan ng mga Brodkaster ng Pilipinas (KBP) ingon man sa Press Council.
Gusto sa acting mayor nga mamahimong kabahin ang local media sa adbokasiya ubos sa iyang pagdumala sa siyudad.
Kini ilabi na sa pilosopiya nga gisunod ni Rama sa iyang pagpadagan sa dakbayan samtang tua pa sa gawas sa nasod si mayor-on-leave Tomas Osmeña.
“So that they can be part of the consciousness, awareness, specially on the philosophy that we’ve been injecting,” sumala sa acting mayor.
“Tul-iron ang hiwi, limpyohon ang hugaw, ninduton ang bati, humuton ang baho, ug han-ayon ang gubot,” maoy gitamdan nga pilosopiya ni Rama.
Gusto sa acting mayor nga makigpinirmahay og kasabutan tali sa local media alang sa hiniusang proyekto dinhi sa dakbayan, tungod usab sa iyang pagtoo nga dako og matabang ang media (print, radio, television) alang sa kalamboan.
Ang plano ni Rama bukas usab nga gihangop sa presidente sa KBP-Cebu Chapter nga si Carlo Dugaduga dihang nahinabi sa Banat News. - BANAT NEWS
- Latest
- Trending
