DOLE nagmonitor sa 2 ka siyudad

Cebu - Padayong gimonitor sa Department of Labor and Employment ( DOLE –7) ang mga dagkong kompaniya sa dakbayan sa Mandaue ug sa Lapulapu tungod sa nahitabong massive retrenchment sa mga trabahante diha sa maong mga lugar nunot sa nasinating ekonomikanhong krisis sa nasud.

Sumala ni DOLE-7 Regional Director Elias Cayanong nga ilang gihatagan og prayoridad sa pag-atiman ang mga kawani nga gipanangtang na sa mga exporting companies sa duha ka mga dakbayan.

Si Cayanong nga nagkanayon nga mahimong makaduol ang mga kawaning natangtang o ang tangtangonon pa ngadto sa ilang ipahigayon nga DOLE “services caravan program” aron matubag ang ilang mga problema ilabina sa wala ikahatag kanilang mga benipisyo.

Gipahibawo ni Cayanong nga unahon nila sa pag-adto mao ang dakbayan sa Lapulapu ilabi na sa Mactan Export Processing Zone (MEPZ) karong Enero 31 ning tuig ug ang dakbayan sa Mandaue sa Pebrero 1 na.

   Dugang pa niya nga ang lugar nga mas daghang mga kawani nga naapektohan sa massive retrenchment ug na-lay-off nga mga mamumuo maoy unahon nila sa pag-atiman. - Chester Abadilla (BANAT NEWS)