Pusher sa Talisay tiklo

Cebu - Nasikop sa kapolisan sa dakbayan sa Talisay ang usa ka 62-anyos nga lalaki kinsa giingong pusher og shabu sa sitio Magay, barangay Tanke niadtong Lunes.

Ang suspetsado giila sa mga polis nga si Joven Bazar, taga Magay, kinsa wala makaikyas dihang mironda ang kapolisan sa iyang panimalay.

Ang mga polis nga mironda sa balay ni Bazar gipangulohan ni Senior Inspector Jovito Canlapan kinsa armado sa search warrant nga giluwatan ni Regional Trial Court (RTC) Judge Soliver Peras sa Branch 10.

Nasakmit sa mga polis gikan kang Bazar ang tulo ka medium nga paketeng shabu, duha ka lighter usa niini repleka sa kalibre .38 revolver ug cutter blade.

Si Canlapan sa pakighinabi sa Banat News mibutyag nga si Bazar nadakpan na niadto sa mao gihapong kalapasan ug gani nakombikto kini apan miapelar siya, hinungdan nga nakapiyansa kini ug nahatagan og temporaryong kagawasan.

Gibutyag usab ni Canlapan nga si Bazar nahimutang sa watchlist sa kapolisan sa siyudad kaniadto, apan natangtang kini sa maong listahan kay giingong mihunong na kini sa ilegal nga negosyo.

 Apan niining bag-o lang, nakadawat na usab ang kapolisan og impormasyon nga ang suspetsado mibalik na usab sa pagpamaligya og ginadiling drugas hinungdan nga ila kining gipanid-an sulod sa duha ka buwan.

Dihang nasuta nila nga positibo ang buhat ni Bazar gisikop dayon nila kini, matud pa ni Canlapan.  - Brenda D. Batuto (BANAT NEWS)