Pribadong sakyanan di kasud sa ihawan

Cebu - Did-an na unya ang pribadong mga sakyanan nga mosulod sa Cebu City Modern Abattoir sugod sa sunod semana kung walay permit gikan sa maong ihawan.

Kini maoy gipahibawo ni City Veterinarian Doctor Alice Utlang human usab makaangkon ang ihawan og meat wagon o meat van.

Matud ni Utlang nga ang nahisgutang lakang maoy pagtuman sa guidelines nga nalatid sa National Meat Inspection Service (NMIS).

Nasayran nga lima lang ka pribadong sakyanan ang nakakuha og permit ug narehistro diha sa ihawan sulod sa gihatag nga tagal ni Utlang.

Kini nagpasabot nga ang maong mga sakyanan na lang ang tugotang makasulod ug makahakot sa inihaw’ng mga hayop gikan sa ihawan.

Gipadayag hinoon sa City veterinarian nga ang ilang meat wagon na maoy motumod sa mga inihaw’ng hayop nga walay kasakyan.

Ang nahisgutang lakang giingon sa City veterinarian nga maoy usa sa ilang mga paagi pagsiguro nga limpyo ang mga karne nga mahatod sa kamerkadohan.

Laing lakang nga padayong gipatuman ni Utlang mao ang regular nga pag-monitor sa kamerkadohan batok sa gipamaligyang double dead nga mga karne.

Ang double dead nga mga karne nagagikan sa mga hayop nga namatay na ug gitiwasan sa pag-ihaw ug gipalusot pagbaligya sa merkado.

Tambag ni Utlang ngadto sa mga konsumidor nga sutaon una sa meat vendor kung ang gibaligya niining karne duna bay meat inspection certificate.

Kini aron dili mabiktima sa mapahimuslanong mga negosyante, ug makapalit na hinoon sa hugaw ug dili haom kan-on nga mga karne. - Elly Bolonos (BANAT NEWS)