Cebu - Ang bise mayor sa lungsod sa San Fernando, Antonio Canoy gikiha og kasong pangawkaw ngadto sa buhatan sa Ombudsman-Visayas gumikan sa giingong pagpaburot sa presyo sa gipamalit niining trash bins niadtong 2006.
Base sa giluwatang affidavit ni mayor Lakambini Reluya atubangan ni Maria Regina Hagad-Fernandez, graft investigation and prosecution officer II, sa Ombudsman Visayas, kini nagsaysay nga si Bise Mayor Canoy maoy responsable sa pagpaburot pag-ayo sa gipamalit niining 100 ka trash bins nga mikantidad lang og P312,700 sa tinuoray nga presyo.
Apan ang maong insidente nahitabo dihang si Canoy mao pa ang mayor sa lungsod sa tuig 1996-2007 diin imbis P312,700 lang ang bayranan sa maong mga trash vins, gigahinan kini og P800,000 niya.
Si Reluya kinsa napiling mayor sa lungsod niadtong tuig 2007 mibutyag nga nahibaw-an niya ang maong anomaliya dihang gisusi niya ang price list sa Rodenstock Manufacturing Corporation nga maoy tag-iya sa pabrika nga naggama sa Euro Mobile trash bins nga tag P3,127 lang ang matag usa niini, busa P312,700 ra ang katibuk-ang presyo sa 100 kabuok.
Apan matud pa ni Reluya nga gigahinan kini ni Canoy og P800,000 nga kun kwentahon, moprisyo og tag P8,000 ang matag usa sa maong mga trash bins.
Hinuon ang mayor sa iyang affidavit nagkanayon nga P750,000 ra ang katibuk-ang nabayad ni Canoy sa maong mga trash vins base sa usa ka tseke sa Development Bank of the Philippines numero CEB 23432162 nga gipetsahan og Disyembre 19, 2006 nga pirmado ni Canoy. Ang maong anomaliya natala na sa report sa Commission on Audit niadtong Pebrero 20, 2008. - BDB (BANAT NEWS)