Cebu - Nabuak ang ulo sa usa ka nag-awol (absence without official leave) nga polis human gidakdaka’g batong motimbang og 10 ka kilo mga alas 7:00 pasado niadtong Lunes sa gabii diha sa may sitio Mahayahay barangay Carreta ning dakbayan.
Ang namatay giila sa kapulisan nga si PO1 Felisforo Hortellano, 53, nagpuyo sa nahisgutang lugar ug nadestino sa Carmen Police Station sa lungsod sa Carmen, Bohol Provincial Police Office apan pipila na ka buwang wala mobalik og duty sa maong lungsod.
Sa imbestigasyon nila ni SPO1 Jay Yballe, chief investigator sa Homicide Section sa Cebu City Office nagbutyag nga nakit-an nalang nagbuy-od diha daplin sa dalan gawas sa iyang panimalay ang biktima tupad sa batong gituuhang maoy gigamit pagdakdak kaniya.
Sumala pa sa kapulisan nga ang namatay’ng si PO1 Hortellano katapusang nakit-an niadtong Lunes sa hapon nga naglakaw paingon sa usa ka dakong mall dinhi sa dakbayan.
Apan pipila ka oras nibalik kini diha sa dapit gawas sa panimalay ug giingong natulog apan nianang pagka-gabii nakit-an kining wala nay kinabuhi nga may dakong samad sa agtang, apapangig ug nabuak na ang ulo.
Ang mga imbestigador sa Homicide Section sa CCPO wala pa gayo'y matumbok kun si kinsa ang mga responsableng mipatay kang Hortellano tungod kay walay testigos nga mipatim-aw, dugang pa niini ngiob ang dapit atol sa pagkahitabo.
Ang hepe sa kapulisan sa dakbayan sa Sugbu, Sr. Supt. Patrocinio Comendador dako ang pagtuong gituyo gyud sa pagdakdak og bato ang ulo sa maong police.
Hinuon ang kapulisan sa dakbayan sa Sugbu nakadawat og report niadtong nangaging mga tuig nga kanunay silang makadawat og alarma sa nahisgutang dapit gumikan usab kay adunay gikaaway ang maong polis. – BANAT NEWS