DepEd andam na sa drug test

Cebu - Nangandam na ang Department of Education (DepEd-7) sa pagpatuman sa random drug test sa mga estudyante sa tunghaang publiko ug pribado karong sunod buwan.

Matud pa ni Regional Director Carolino Mordeno sa Dep-Ed 7 kagahapon nga gipadala na niya ang iyang mga medical personnel ngadto sa Tagaytay City aron motambong sa usa ka orientation seminar kalabot sa maong kalihokan.

Kauban sa Dep-Ed sa maong programa mao ang mga ahensya sa Department of Health, Dangerous Drugs Board ug Philippine Drug Enforcement Agency.

Midugang si Mordeno nga ang mga guidelines sa maong drug testing maoy tukion sa orientation nga ipahigayon didto sa kaulohan.

 Iyang giawhag ang mga ginikanan nga motabang sa pagpadasig sa ilang mga anak nga mopailawom sa maong drug testing aron masayran nila kung nagbisyo ba og illegal nga drugas o wala ang ilang anak.

Ang masakpan nga tiggamit og ginadiling drugas dili ekspulsahon sa pag-eskuyla apan kinahanglang ipaslak kini sa usa ka drug rehabilitation center.

Hinoon nagkanayon si Mordeno nga ang ilang superbisahan mao ra ang mga estudyante sa high school, samtang ang kolehiyo superbisahan usab sa Commission on Higher Education.

Ang maong kalihokan maoy pagtuman sa mando ni Presidente Gloria Macapagal Arroyo kinsa mao karon ang drug czar sa nasud.

Ang tinguha sa Pamuno nasud mao nga masanta ang mga estudyante gikan sa pagsalmot sa makabuang nga bisyo. - Romeo T. Limpangog (BANAT NEWS)