Gas station gitulis pagbunok sa uwan

Cebu - Gitulis na usab sa ikatulong higayon ang Caltex gas station nga nahimutang sa dalan Punta Rizal barangay Poblacion dakbayan sa Lapulapu kagahapon sa kaadlawon atol sa pagbundak sa kusog nga ulan.

Giila sa kapolisan ang tag-iya sa maong gasolinahan mao si Fredrick Aliño nga gibantayan sa kaherang si Aveniego Gabiso.

Matud pang Gabiso silang duha ra sa pumpboy dihang kalit nga miabot ang usa ka wala mailhing tawo ug miabli sa pultahan dayong tion kanila og .45 kalibreng pistola ug mideklarar og tulis.

Gumikan sa kahadlok nga sila pusilon gihatag nalang ni Gabiso ang halin kapin P6 mil ngadto sa tulisan.

Nasuta nga wala diay makaporma ang gwardiyang si Anthony Kilario sakop sa Petros Security Agency nakalitan usab sa pag-abot sa duha ka motorsiklo gisakyan sa mga tulisan.

Ang usa miduol kaniya ug mition usab sa kalibre .45 dayong kuha sa iyang service firearm nga kalibre .38 ug gipanguhaan og bala dayon gilabay sa layo.

Sumala pa sa mga biktima mikabat lang sa tres minutos ang gihimo sa tulisan maong wala nila maklaro ang mga panagway gumikan kay nagsul-ob usab kini og mga helmet nga mata lamang ang makita ug dayong sibat padung sa duha ka mga taytayan.

Ang mga mirespondeng kapolisan wala na makaapas sa mga tulisan tungod kay walay nakahatag kanila og klarong direksyon, apan dako ang ilang pagdudang taga dinha ra sa dakbayan ang mga suspek.

Ang maong gasolinahan sumala pa sa kapolisan gikatahong makatulo na tulisa sa mga nangaging mga bulan ug bisan paman sa nahauna nang insidente wala gihapoy gibutang nga security camera diha sa palibot niini. - Bong Soriano (BANAT NEWS)