Cebu - Nangreklamo na ang mga magtutudlo sa mga night high schools sa dakbayan sa Sugbu tungod sa giingong kanunay’ng malangay nilang suhulan.
Kini maoy gipahibawo ni City Hall Education Consultant Joy Augustus Young nga mao usab ang kanunay sumbungan sa mga magtutudlo labot sa maong problema.
Nasayran nga ang kagamhanan sa dakbayan maoy nag-sweldo sa kapin sa 400 ka mga magtutudlo sa mga night high school sa siyudad.
Matud pa ni Young nga dugay na ang nahisgutang problema apan hangtud ning higayuna wala gihapon mahatagi og igong solusyon.
“Magsige lang ko og follow-up, kapoy kaayo ba unya wala lang gihapon na masulbad bisan kung gi-ATM na ang ilang suhulan,” sumala ni Young.
Tungod niini gipadangat na ni Young ang nahisgutang problema ngadto kang acting mayor Michael Rama aron kini mahatagan og igong pagtagad.
Nagtuo ang education consultant nga ang kakuwang sa personnel partikular na diha sa City Treasurer’s Office maoy hinungdan sa kalangan, subay niini gisugyot ni Young ngadto kang Rama nga dugangan og mga tawo nga nag-proseso sa payroll.
Nabalaka ang education consultant nga maapektahan ang trabaho sa mga magtutudlo kung magpadayon ang kalangay sa ilang suhulan tungod kay kasagaran sa maong mga magtutudlo nagsalig ra sa sweldo alang sa ilang inadlaw-adlaw nga panginahanglan.
Matod ni Young nga sa kasamtangan, wala pa makadawat ang mga magtutudlo sa ilang suhulan niadtong miaging buwan. - BANAT NEWS