Dentista gireklamo sa iyang pasyente

CEBU - Usa ka dentista gikiha sa iyang pasyente nga iyang gibinastos samtang nag-ayo sa iyang ngipon pinaagi sa paghikaphikap sa pribadong bahin sa iyang lawas sulod sa klinika niini sa Sitio Cabuntan, barangay Bolinawan, siyudad sa Carcar niadtong Sabado sa alas 5 sa hapon.

Ang pasyente nga si Petronila Ordenisa, 40, dalaga, taga barangay Candaguit, lungsod sa Sibonga, mipasaka og kasong acts of lasciviousness batok ni Dr. Celestino Baretua Jr., 43, minyo ug nagpuyo sa nahisgutang lugar diin nahimutang usab ang iyang klinika. Ang kaso gipasaka na sa piskaliya sa Carcar.

Matud ni SPO1 Nestor Gascon sa Carcar City Police Station sa dihang nahinabi sa Banat News, si Ordenisa nagpa-blotter sa ilang buhatan ug mipasangil nga gibinastos ni Baretua atol sa iyang pagpa-repair sa iyang ngipon.

Gitug-an ni Ordenisa atol sa gihimong pagsukitsukit sa kapolisan nga samtang gipahigda siya ni Baretua sa dental chair sulod sa klinika niini aron pagpalimpyo sa iyang ngipon, gisugdan usab siya og hikaphikap sa iyang duha ka paa paingon sa iyang tiyan ug gitukod pa niini ang duha niya ka mga siko sa iyang dughan sentro sa duha ka totoy ug pagkahuman nanghikaphikap kini sa iyang dughan.

Gidugang sa reklamante nga human sa iyang pagtunol sa bayad, gi-isyuhan siya og resibo ni Baretua ug samtang naglingkod siya gibutang sa iyang duha ka paa ang resibo ug pagkahuman gihapit og hikap ang iyang kinatawo apan maayo na lang kay nagsul-ob siya og maong nga karsones.

Pagkahuman niya og dawat sa resibo, nagdali si Ordenisa sa paglakaw deretso sa Carcar City Police Station aron ireklamo ang pagbinastos nga gihimo sa dentista.

Matod ni SPO1 Gascon nga gipasaka kagahapon sa alas 10 sa buntag sa Carcar Prosecutor’s Office ang kaso batok sa doktor. (BANAT NEWS)