Anak og mayor wa isulod sa selda

CEBU - Anak og mayor sa Bais City, Negros Oriental gipagawas kagahapon sa udto sa karsel sa Carbon Police Station bisan walay ‘release order’ samtang nagpaabot nga mapupos ang reglamentary period tungod kay wala mopasaka ang La Fortuna Hotel sa dalan Borromeo nga mipasaka og kasong malicious mischief batok niini.

Si Edu Villanueva, 24, ulitawo, anak ni Mayor Hector Villanueva sa Bais City gidakop sa mga sakop sa Miscellaneous Team sa Carbon Police Station human gireklamo sa tagdumala sa La Fortuna Hotel tungod sa pagdaob niini sulod sa hotel.

Sumala pa sa kapolisan nga nakita sa CCTV camera sa hotel si Villanueva nga midaob og mga gilikitlikit nga resibo ug gidul-it patungod sa sprinkler sa storage room sa parking area sa ikaduhang andana hinungdan nga misirit ang tubig gikan sa sprinklers sa 40 ka mga lawak. Nangabasa ang mga kama sa 40 ka lawak ug nagbaha ang tubig.

 Atol sa pagduaw sa mga sakop sa media kagahapon diha sa Carbon Police Station, nasuta nga wala na didto si Edu. Mismo si Sr. Insp. Pablo Cabildo miatubang sa media ug igo lamang kining miingon nga “aduna lay gipalit didto sa gawas.”

Si Sr. Insp. Cabildo mipakita sa blotter ngadto sa mga sakop sa media. Ang blotter gibutangan og remarks nga “released” apan walay petsa ingon man oras sa pag-release ni Edu nga niadtong higayona wala pa mapupos ang reglamentary period hangtod alas 5 sa hapon. Wala usab kini pirma.

Mipasabot kini nga ila lang gipagawas si Edu sa bilanggoan tungod kay nagsige kini og reklamo sa kabaho ug ang management sa hotel dili interesado nga mopasaka og kaso kagahapon human iyang gika-estorya tungod kay nagkasabot na sa ginikanan ni Edu.

Adunay mga piniriso sa Carbon Police Station nga wala magpaila ug mikonpirmar nga walay Edu nga nasulod sa maong bilanggoan sukad niadtong Sabado. Sukwahi sa gipadayag sa ilang hepe nga ila lang gipagawas si Edu human usab kini nag-sige og reklamo gumikan sa kabaho sa selda.

Si Sr. Insp. Cabildo nga gikahinabi sa Banat News miangkon nga aduna gyud siya pagpabaya sa maong insidente human misalig lang siya sa usa ka PO1 Dequiam Sardoncillo nga usa ka polis sa Bais City ug higala ni Edu. Wala masuta unsay misyon ni PO1 Sardoncillo nganong dinhi kini sa Sugbo niadtong higayona.

Sa dihang gi-usban sa pagtawag sa Banat News, gibutyag ni Sr. Insp. Cabildo nga mikaon lang diay si Edu sa Warwick Barracks uban ni PO1 Sardoncillo apan mibalik ra usab pagkahuman ug ilang gibalhog sa selda.

Si Sr. Insp. Cabildo miingon nga andam siyang moatubang kun adunay imbestigasyon nga ilusad si Sr. Supt. Patrocinio Comendador gumikan sa maong hitabo.

Gihimakak hinuon sa hepe ang pangangkon sa mga piniriso nga wala ibalhog sa selda si Edu. (BANAT NEWS)