Taga City Hall nagpaopaw

CEBU - Nagkadaghan karon ang mga opisyal sa dakbayan sa Sugbu nga magpa-opaw agi og pagpakita sa ilang simpatiya ngadto kang Mayor Tomas Osmeña kansang buhok upaw na karon samtang nagpadayon ang chemotherapy sa sakit niining kanser sa urinary bladder kon pantog.

Nasayran nga unang nagpaopaw ang bugtong anak sa mayor nga si Miguel agi og pagsimpatiya sa iyang amahan nga nawad-an na sa buhok.

Gikataho nga ubay-ubay sa mga tigpaluyo sa mayor dinhi sa Sugbu ang gusto usab nga magpa-opaw aron pagpakita sa ilang suporta ngadto sa mayor.

Labing minos duha ka konsehal usab sa dakbayan nga nahinabi sa Banat News ang nipadayag sa ilang tinguha kagahapong adlawa nga magpa-opaw kung gikinahanglan pagpakita og simpatiya sa leader sa Bando Osmeña Pundok Kauswagan (BOPK).

Ang duha ka konsehal nga bokal nga nipadayag sa ilang suporta ngadto kang Osmeña mao sila si Sylvan Jakosalem ug Augustus Pe Jr. nga andam silang mopaupaw.

Matud ni Jakosalem nga dili na bag-o kaniya ang pagpa-opaw tungod kay kini iya nang gihimo niadtong tuig 2004 dihang gioperahan sa iyang ulo.

“Why not, anyway it’s also better to be opaw sometimes kay the hair that will grow back will be out-cared,” sumala ni Jakosalem.

Sa iyang bahin, nagduha-duha hinuon si Pe kung motugot ba si Osmeña sa mga kaalyado niini ug mga tigpaluyo nga magpa-opaw apan kini mipadayag nga walay dautan sa maong lakang ug gani siya andam nga magpatupi kung gikinahanglan.

“Maayo man na in support to Mayor Tommy but I don’t think that the mayor will approve ana nga ideya kay duna man gyuy dili ganahan nga magpa-opaw,” matud ni Pe.   

(BANAT NEWS)