3 ka barangay workers sa Calamba positibo sa shabu

CEBU - Laing tulo ka mga kawani sa barangay ang nasakpang tiggamitan og illegal nga drugas human sa kinalit nga drug testing kagahapon sa mga sakop sa Cebu City Office for Substance Abuse Prevention (Cosap) diha sa barangay Calamba ning dakbayan.  

Matud pa ni Calamba barangay captain Victor Quijano Jr., nga mokapin sa 50 ka mga kawani ug opisyales ang gipaubos kagahapong adlawa sa drug screening test sa tinguha nga mapapas ang mga pagduda sa ilang mga konstituwente.

 “Aron gyud ma-determine ug mapapas ang pagduda sa mga tawo ba kay kahibawo na ka nga kining among barangay duna poy nag-negosyo og drugas,” sumala ni Quijano.

Gitataw ni Quijano nga siya dili magduha-duha pagtaktak sa iyang mga sakop kung kini masuta ug mapamatud-an nga tigamitan og ginadiling drugas.

 “Ang-ang man og atong ipabilin, putbulon gyud nato, kung kinsa tong mapositibo dili na nato hatagan og appointment,” dugang pamahayag ni Quijano.

Nasayran gikan kang Cosap chairman Jose Felix Lazarte nga sa 58 nga napaubos sa kinalit nga drug test, tulo ang napositibo niini sa paggamit og shabu, usa niini garbage truck driver ug duha ka babayeng sakop sa clean and green sa barangay, hinuon base sa proseso ipaagi pa kini sa confirmatory drug test.   (Elly Bolonos)   (BANAT NEWS)