Puya gilabay sa baybay

Cebu - Usa ka puya nga gibanabanang may 5 ngadto sa 6 ka buwan, napalgan didto sa baybayon sa Sitio Kamansi, barangay Pajo, Lapulapu City, niadtong Biyernes sa kaadlawon.

Si Roel Ygot Dian, 37, taga Kamansi kinsa maoy nakakita sa maong fetus nagkanayon nga naglakaw-lakaw siya sa baybayon kay nagpahayahay dihang nakita niya ang wala nay kinabuhi nga hinilog nga gipatong sa ibabaw sa bato.

Sa iyang kakurat iya dayong gipahibawo ang iyang mga silingan ug ang kapolisan sa dakbayan.

Si SPO2 Rex Ibañez sa homicide section sa Lapulapu City Police Office nagkanayon nga nakadawat sila og taho nga may usa ka manginginhas nga wala hiilhi kinsa giingong maoy mipatong sa maong puya sa ibabaw sa bato niadtong Huwebes.

Gipalubong sa kapolisan ang maong puya sa Humay-humay public cemetery.

Ang mga tigpaniid nagkanayon nga mao kini paagi niadtong mga tawong dili mosagop sa family planning sa gobyerno sa kahadlok nga latigohon sila sa simbahan.

Maoy hinungdan nga magsige lang og palami unya inigka porma na sa bata sa ilawom sa tiyan hilogon ug isalibay nalang bisan asa, sumala sa nagpakabanang molupyo. – BANAT NEWS