May piskalnga dili gustong mag-armas

Cebu - Bisan pa sa pag-ambush patay kang Cebu City Assistant prosecutor Patrick Ian Osorio sa barangay Mambaling ning siyudad sa Sugbu duha ka semana na ang nakalabay, aduna pa gihapoy mga prosecutors nga dili buot magtinil og armas isip proteksyon.

Sumala pa ni Cebu City Prosecutor Nicolas Sellon nga silang mga prosecutors nibati usab og kahadlok sa pagpatay kang Osorio.

Gani alisto na kaayo sila sa ilang seguridad aron dili mahisama sa napusilan patay nilang kauban.

Apan bisan pa man niini may pipila sa iyang mga kaubanan sama sa mga babayeng piskal ang mipadayag nga dili buot makabaton og armas pagprotektar sa ilang kaugalingon.

Mas gusto pa sa maong mga piskal ang mag-amping sa kanunay sa ilang inadlaw-adlaw’ng gimbuhaton ilabi na kung naa sila sa pampublikong lugar.

 Nasayran nga si Sellon nitumbok nga ang prosecutor taudtaud nang gitugutan nga magdala og armas aron maprotektahan ang kaugalingon subay usab sa pagtugot nga gihatag sa Department of Justice kon DOJ ang nitabang kanila aron makakuha og permit to carry firearms. - Chester Abadilla (BANAT NEWS)