Imbestigasyon sa Miss Cebu 2009 sugdan na ugmang adlawa

Cebu - Sugdan na ugmang adlawa ang imbestigasyon sa kontrobersiya nga nitumaw atol sa pagpahigayon sa nabulabog nga Miss Cebu 2009 nga apil sa mga kalihukan sa milabay’ng Sinulog.

Nabulabog ang pagpahigayon sa nahisgutang indigay tungod usab sa sayop nga pag-anunsyo sa mananaug sa Texters Choice Award nga imbes nga si Kimberly Therese Burden maoy tinuod nga nidaug sa maong pasidungog, si Kris Tiffany Janson maoy gitawag ug gihatagan sa maong award.

Butang nga dili madawat ni Burden ingon man sa ginikanan ug mga supporters niini nga nasayod nang daan kung kinsay nidaug sa maong award.

Kini ang hinungdan nga niprotesta ang kampo ni Burden nga niresulta sa pag-uli sa mga nakuha ni Kimberly isip second runner-up sa pageant.

Matud ni Cebu City Acting Vice Mayor Hilario Davide III nga usa ka tigom ang iyang ipatawag ugmang adlawa alang sa pormal nang pagsugod sa imbestigasyon.

Ang acting vice mayor kinsa mao usab ang acting chairman sa Cebu City Tourism Council (CCTC) mopatawag ugmang adlawa sa tanang nalambigit sa kontrobersiya.

Buot ni Davide nga manubag ang dunay kasaypanan aron magpabilin ang kredibilidad sa CCTC kinsa maoy nagpasiugda sa Miss Cebu 2009.

Gisangunan sa acting vice mayor pagpadayon sa imbestigasyon mao ang komitibang gihulma nga gipanguluhan ni Konsehal Gerardo Carillo sulod sa kinse ka adlaw.

Kahinumduman nga ang marketing consultant sa CCTC nga si Bruce Bullozos nangayo na og public apology ngadto sa pamilyang Burden ug miangkong siya’y nasipyat pagbasa sa text poll result nga mao usab ang iyang gihatag ug gianunsyo sa entablado.

Bisan kung ang maong hitabo gihulagway ni Bullozos nga usa ka honest mistake, apan kini dili madawat sa pamilyang Burden. - Elly Bolonos (BANAT NEWS)