Cebu - Naalarma si Cebu City Councilor Arsenio Pacaña sa taho nga dunay Salmonella bacteria contamination ang U.S brand peanut butter.
Kini tungod kay ang pagkaon nga nasagulan og Salmonella bacteria giingong moresulta sa abdominal cramping, diarrhea, hilanat ug uban pa.
Ang konsehal nga maoy chairman sa Committee on Trade and Commerce sa City Council niingon nga kini kinahanglang mapangitaan gilayon og solusyon.
Subay niini giawhag ni Pacaña ang Bureau of Food and Drugs (BFAD) nga mobutang og mga advisories diha sa mga supermarkets.
Lakip usab nga giawhag sa konsehal ang mga manufacturers nga siguruhong luwas ang ilang mga produkto gikan sa Salmonella.
Nasayran nga dunay mga U.S. brand peanut butter nga gipamaligya sa local market nga nakapatumaw sa katahap sa mga konsumidor.
Hinuon sa gihimong pakisusi sa BFAD, walay usa niini nga napositibo sa Salmonella bacteria hinungdan nga kini luwas kan-on sa tawo.
Apan usa gihapon ka resolusyon ang ipalabang ni Pacaña atol sa umaabot nga sesyon sa City Council nga mag-awhag sa BFAD pagpadayon sa gihimo niining pakisusi. - Elly Bolonos (BANAT NEWS)