Estudyante sa 6th district may libro na

Cebu - Dili na suliran sa mga estudyante sa ika-unom nga distrito ang pagpangita og mga libro nga ilang mabasa alang sa ilang mga research nga himuon.

Kini tungod sa kadaghang libro nga mabasa nila karong libre diha sa bag-ong giablihan nga library hub sa Cordova Elementary School sa lungsod sa Cordova.

Si Mayor Adelino Sitoy nga maoy naningkmot niini, mibutyag sa DYDD Bantay Radyo ug Banat News nga ang maong library hub nga gigastohan og P10 milyones sa Department of Education (DepEd) 7 gitumong alang sa mga estudyante sa elementarya ug sekondarya sa ika-unom nga distrito, busa gidapit niya ang tanang ginikanan sa tibuok distrito sa pagpahimulos niini.

Si Sitoy dako kaayo og pasalamat sa taga DepEd gumikan sa pagpili sa lungsod sa Cordova nga maoy nahimutangan sa maong library.

Gipaabot usab ni Sitoy nga ang ubang distrito ning lalawigan makabaton og susamang library hub nga gitukod sa DepEd diha sa Cordova. - Darrel A Carumba (BANAT NEWS)