Mas bug-at nga tahas ang posisyon ni Cerge

Cebu - Giangkon sa Sugboanong bag-ong natudlong Press Secretary nga si Cerge Remonde nga mao kini ang labing lisod nga tahas sa iyang career.

Kini maoy ikaupat nga posisyon nga gihuptan ni Remonde sukad nasulod siya sa pamunoan ni Presidente Gloria Macapagal Arroyo.

Si Remonde atol sa interview sa usa sa mga sibyaanan dinhi sa Sugbu kagahapong adlawa nagkanayon nga andam na siyang moatubang sa umaabot niyang tahas isip Press Secretary sugod Pebrero Uno.

Kini human sa gihimong re-shuffling sa gabinete ni Presidente Gloria Arroyo diin iyang gihulipan si Jesus Dureza tungod kay ang naulahi maoy mihulip kang Presidential Legal Counsel Sergio Apostol Jr..

Daghan ang nitumaw nga pagduda ang pagpanabi ni Jesus Dureza sa miaging tuig atol sa ilang cabinet meeting nga si Arroyo posibleng malugwayan pa ang termino karung 2010 maoy nakaingon nga gibalhin siya sa maong posisyon ni Arroyo.

Apan ang maong pagduda kusganong gihimakak ni Remonde sanglit matud niya si Dureza mao gyud ang nihangyo nga magpabalhin og dili bug-at nga posisyon aron makaatiman sa iyang asawa nga nagmasakiton.

Hinuon niingon si Remonde iyang respetuhon ang tanang nitumaw nga mga pagduda ilabi na sa taga oposisyon sanglit ila kining opinyon.

Giklaro niya nga ang naka-trigger gyud sa maong revamp mao ang asawa ni Dureza nga nagmasakiton.

Ang biyaang posisyon ni Remonde nga Presidential Management Staff dad-on ni Hermogenes Esperon Jr. kinsa mao karon ang kasamtangan presidential adviser on the peace process.

Ang mohulip unya sa posisyon ni Esperon mao ang retiradong PNP Chief Avelino Razon Jr. kinsa maoy deputy director-general of the National Security Council.

Samtang ang Land Transportation Office chief Alberto Suansing mahimo nang Undersecretary sa Department of Transportation and Communication hulip kang Maria Elena Bautista kinsa gitudlo usab nga administrator sa Maritime Industry Authority. - Rey Pasaporte (BANAT NEWS)