Mihulip nga opisyal nasurpresa

Cebu - Ang bag-ong commander sa Central Command Major General Armando Cunanan nakurat nalang dihang iyang nadawat niadtong miaging gabii ang kamanduan sa labaw sa Armed Forces of the Philippines (AFP) nga siya maoy ihulip sa mi-retirong si Lt. Gen. Pedro Ike Inserto.

Si Cunanan atol sa paghatag sa iyang mensahe kagahapon sa buntag sa turnover ceremony sa Camp Lapulapu sa barangay Apas miangkong wala gani siya makapreparar og ‘speech’ ug bisan ang iyang pamilya wala niya madala.

Ang turnover of command gitambungan ni AFP chief of staff Gen. Alexander Yano ubang opisyales sa militar ug kapolisan.

Si Cunanan kinsa maoy commander sa Eastern Mindanao nga nakabase sa Davao City nagkara-kara og biyahe panganhi sa Sugbu aron dawaton ang responsibilidad nga gisangon kaniya.

Gipasalig hinuon niyang padayunon ang mga maayong programang nasugdan ni Inserto partikular ang pagpuhag sa insurhensya sa ingon mapalambo pa og maayo ang kahapsay ug kalinaw dinhi sa Central Visayas ug magpabilin ang pagka-‘tourist friendly’ sa rehiyon.

Samtang gipasalig usab niini sa mga sakop sa media nga bukas ang Central Command sa tanang higayon nga may mga pangutana ingon man mga kalambuan sa komunidad. – BANAT NEWS