Cebu - Gisugdan na sa pagmonitor sa Bureau of Foods and Drugs (BFAD)-7 ang mga kamerkadohan dinhi sa lalawigan ug sa tibuok Central Visayas aron pagsuta sa mga produkto nga kontaminado sa salmonella virus.
Kini human mipadala og advisory ang BFAD Manila nga nagmando nga pahimoan dayon og lakang ang paghabwa sa mga imported nga brand sa peanut butter ug peanut butter paste gikan sa mga tindahan dinhi sa rehiyon.
Si Dr. Angelita Salarda, chief sa BFAD-7 miingon nga sa pagkakaron gipahugtan nila ang pagmonitor sa mga kamerkadohan aron limpiyohan gikan sa mga peanut butter nga kontaminado sa salmonella virus.
Sa laing bahin gipahibawo usab ni Regional Director Susana Madarieta sa Department of Health (DOH)7 nga wala pa sila’y nadawat nga mga taho kalabot sa mga tawong nataptan sa salmonella virus.
Ang pipila sa mga simtoma niining salmonella virus mao ang pagsukasuka, kalibanga, pagkalipong ug taas nga hilanat.
Busa higpit nga gipasidan-an ni Madarieta ang publiko sa paglikay pagpalit og pagkaon sa mga imported nga peanut butter aron sa pagsiguro nga dili matakdan sa salmonella virus. - BANAT NEWS