Traysikol sa Minglanilla mireklamo vs habal-habal

Cebu - Nasagmuyo ang konsehal sa barangay Tulay lungsod sa Minglanilla nga si Konsehal Jaime Pardillo sa mga habal-habal sa lungsod nga unta sa bukirang bahin lamang sila gitugutan nga makapamasahero.

Si Pardillo kinsa presidente usab sa TODA-TUCABA, usa ka asosasyon sa mga traysikol drayber sa maong lungsod, midangop sa Banat News aron mapaabot ang reklamo ngadto sa mga hingtungdan.

“Kani silang mga habal-habal, didto ra na sila sa bukirang bahin gitugutan nga mamasahero, unya mikalit lang na sila og abot dinha sa lungsod mao na ang gireklamo sa mga tricycle drivers ngadto sa munisipyo ug kapolisan sa Minglanilla,” matud pa ni Pardillo.

Apan matud pa ni Pardillo nga wala’y nahitabo sa ilang reklamo kay wa’y gihimong aksyon ang munisipyo bisan gimando atol sa sesyon sa konseho ni Konsehal Lynette Geonzon nga ipadakop ang mga habal-habal drayber.

Dili pud patas alang kang Pardillo ang gihimo sa mga habal-habal drayber kay makapamasahero sila bisan wa’y prangkisa samtang ang mga traysikol drayber di makalarga kun wa’y prangkisa.

Nakapasagmuyo usab kang Pardillo mao ang pamahayag ni Konsehal Ramsi Sayson nga maoy chairman sa Peace and Order Council nga huwaton na lang mo-expire ang mga prangkisa sa mga traysikol drayber unya maghabal-habal na lang ang ipabilin.

Mipahibawo si Pardillo nga aduna na’y mga polis nga gipakatap sa lungsod apan walay nahimo.

Sumala pang Pardillo nga nagkaanam og kawad-an og panginabuhian ang mga traysikol tungod sa operasyon sa maong mga habal-habal, apan mipadayag nga misabot usab sila sa kahimtang sa mga drayber niini.

“Dili man mi supak nga mamasahero sila, pero unta ibutang lang saktong lugar, adto gyud sila sa bukid,” hangyo sa konsehal.

Ang maong reklamo gipadangat na ni Pardillo sa Ombudsman for the Visayas. - Loraine Ebisa (BANAT NEWS)