Mga barangay sa Lapulapu ug Mandaue 'maunlod'

Cebu - Mga yuta daplin sa baybayon sa dakbayan sa Lapulapu ug Mandaue posibleng mapapas gumikan sa "global warming” epekto kini sa pagtaas sa giladmon sa tubig.

Sa paglusad sa Metro Cebu Airshed Board ug pagpinirmahay sa mga mayor sa mga kalungsuran ug dakbayan sa Metro Cebu si Atty. Benjamin Cabrido Jr., nga usa ka environmental lawyer mipadayag nga lima ngadto sa napulo ka tuig gikan karon posibleng ubay-ubay sa mga kayutaan sa coastal barangays sa dakbayan sa Lapulapu ug Mandaue ang mapapas sa "teritorial jurisdictions" sa maong mga dakbayan gumikan sa pagtaas sa sea level sa kadagatan.

Si Mandaue City Mayor Jonas Cortes nga nahinabi sa Banat News mipadayag nga angayang magtambayayong ang tanan pagsulbad niini ilabi na ang DENR nga maoy adunay gahum sa pagsumpo sa mga malapason sa "Clean Air Act."

 Mibahad si Cortes nga kun dunay pabrika sa ilang dakbayan nga nakalapas niini di siya magpanuko pagpasira niini kun irekomendar sa DENR.

Usa sa mga hinungdan sa global warming mao ang polusyon tungod kay ang aso matigum sa kalangitan ug maoy nakabuslot sa ozone layer hinungdan nga molapos na ang init sa adlaw.

Laing hinungdan mao nga kabaga na sa polusyon sa ibabaw maoy nakaingon nga ang init sa adlaw nga moigo sa kalibutan di na makahungaw sa taas ug ang epekto niini mao ang pagkalanay sa mga “icepacks” sa North ug South Poles maong mitaas ang level sa dagat.

Ang Metro Airshed Board pinanguluhan ni DENR Sec. Lito Atienza nagpinirmahay og kasabutan nga lihukon ang kampanya kontra polusyon ilabi na ang pagpatuman sa Clean Air Act.

Si Sen. Miguel Zubiri kinsa usa usab sa mipakita og kabalaka niini midugang nga ang epekto sa global warming karon mao ang mga pagbaha, landslides ug uban pang kausaban sa panahon. - Bong Soriano (BANAT NEWS)