Gubalane tagbaw sa imbestigasyon

Cebu - Gipadayag ni Regional State Prosecutor Ferdinand Gubalane nga natagbaw siya sa nagpadayon nga inbistigasyon sa kapolisan ug NBI kalabot sa pag-ambush patay ni Cebu City Assistant Prosecutor Patrick Ian Osorio niadtong nakalabay nga semana.

Kini bisan pa man kun hangtod karon wala pa matumbok kun si kinsa gyud ang nagmotorsiklong mga suspetsado ug nagmaster mind sa pagpusil patay ni Osorio.

Matud pa ni Gubalane nga nakauyon siya sa hiniusang paningkamot sa PNP ug sa NBI nga mailhan ang suspetsado ug pagsubay sa tanang anggulo sa maong krimen.

Samtang uyon usab si Gubalane sa sugyot ni Cebu City Prosecutor Nicolas Sellon nga patangkilon og armas ang tanang mga piskal alang sa ilang kaugalingong protection.

Gitumbok usab niya nga dili lang mga piskal ang angayan nga magtinil og armas kun dili mas maayo kun maapil ang mga huwes o ni bisan kinsa nga nagtrabaho sa korte basta may lisensiya ang armas ug may permit to carry firearm ang maghupot niini.

Samtang ang pagpusil kang Osorio gikondenar sa hunta probinsyal pinaagi sa usa ka gipalabang nga resolusyon niini.

Si Provincial Board member Victor Maambong nga maoy nangamahan sa maong resolusyon nagkanayon nga ang pagbanhig kang Osorio maoy pagluglog sa hustisya ug pagtandog sa kalinaw ug kahusay sa Sugbo. - Chester Abadilla ug Rey Pasaporte (BANAT NEWS)