Cebu - Usa ang namatay ug duha ang naangol sa nahitabong karambola sa tulo ka mga sakyanan nga gilangkoban sa motorsiklo, biseklita ug traysikad sa highway sa sitio Sambag barangay Sangi siyudad sa Toledo niadtong niaging adlaw.
Ang namatay paghiabot sa tambalanan dinhi sa dakbayan sa Sugbu mao ang drayber sa biseklita nga si Danilo Belo, 42, ug molupyo sa nahisgutang lugar.
Samtang ang duha nga mga nangaangol ug nalandig usab sa tambalanan mao ang drayber sa motorsiklo nga si Ivan Rey Barquin Cañeda, 22, nagpuyo sa Luray-II ingon man ang drayber sa traysikad nga si Cepriano Hontiveros Villaraiz, 37, nagpuyo sa barangay Ilihan pulos mga barangay nga sakop sa nahisgutang siyudad.
Matud ni SPO1 Lorenzo Mahilum, traffic investigator sa Toledo City Police dihang nahinabi sa Banat News gikan sa Luray-II ang motorsiklo ug paingon unta kini sa barangay Ilihan apan paghiabot niini sa maong lugar gikatahong gidasmagan niini ang gikasugat nga sakyanan ug pagkahuman nawad-an kini sa preno ug didto mobangga sa gikasugat nga traysikad nga nagsunod sa biseklita.
Ang tulo pulos gidala sa Toledo City District Hospital human sa hitabo apan girekomendar dayun sa mga doctor ang drayber sa biseklita ug motor nga ipadiretso sa tambalanan dinhi sa dakbayan sa Sugbo tungod sa seryosong mga kahimtang.
Matud ni SPO1 Mahilum kagahapong adlawa nibisita sa ilang buhatan ang asawa sa drayber sa biseklita nga si Emma Belo ug nagpahibalong namatay gyud ang iyang bana sa maong aksidente. - Darrel Carumba (BANAT NEWS)