CEBU - Gihagit sa Kapitolyo si Mayor-on leave Tomas Osmeña nga ipadayon ang pagpasaka og kasong economic sabotage batok sa probinsiya tungod sa giingong pagsamok-samok nga mapalit sa Filinvest Land Inc. ang 50 ka hektaryang lote sa South Road Property kon SRP.
Sumala pa ni Atty. Rory Sepulveda nga ikalipay ni Gobernador Gwendolyn Garcia ug sa probinsiya sa Sugbu kun ipadayon sa mayor ang maong kaso aron masayran kun si kinsang interests ang nasabotahe.
Gipasabot ni Sepulveda nga ang katuyoan sa probinsiya sa Sugbu sa pag-apil sa bidding mao nga aron mahatag sa probinsya ang mas maayong offer sa siyudad sa Sugbu itandi sa gi-offer sa Filinvest nga hangtod karon wala pa buksi ug gipahibawo sa publiko o sa buot moapil sa bidding.
Sumala pa ni Sepulveda, ang probinsiya dili usa ka fly-by-night nga developer nga angay'ng i-disqualify sa Joint Venture Committee.
Gani walay laing land developer dinhi sa Sugbu nga makalupig sa gidaghanon sa nahimong aspaltado ug kongkretong dalan, taytayan ug mga building sa tibuok probinsiya.
Si Sepulveda nagkanayon nga andam silang moatubang sa kaso kay ang interest sa gobernadora sa pag-apil sa bidding mao ang kaayuhan sa mga Sugbuanon ug posibleng ang giingong nasabutaheng interest sa pag-apil niini sa bidding mao ang interests sa mayor ug dili ang siyudad sa Sugbu.
Dugang pa ni Sepulveda nga mohimo og lakang ang Kapitolyo apan dili kini magpadiktar sa impluwensiya sa nagpatambal nga mayor didto sa Texas USA. (BANAT NEWS)