Lola Nasakmita'g 5 Ka Pistola

CEBU - Usa ka 51-anyos nga lola ang nagtingkagol na karon sa karsel sa kapulisan sa dakbayan sa Bogo human makuhai’g lima ka kalibre .45 pistola uban sa mga magazine niini nga way lisensya niadtong Sabado sa alas 11:00 sa buntag sa San Vicente Wharf barangay San Vicente sa nahisgutang dakbayan.

Ang suspetsadong lola giila sa kapulisan nga si Elizabeth Alburo, 51, taga barangay Guinsay dakbayan sa Danao nadakpan samtang padulong mosakay og pumpboat nga paingon sa lungsod sa Villaba, Leyte.

Si SPO4 Allan Dosdos, imbestigador sa Bogo City Police Station nga gikahinabi sa Banat News miingon nga kagahapon sa buntag ila nang napasakaan og kaso si Alburo nga kalapasan sa Republic Act R.A. 8294 kon illegal possession of firearms.

Matud pa ni SPO4 Dosdos sila si SPO2 Nestor Cuerda, PO1 Gilbert Agodo mga sakop sa Philippine Coast Guard sa Bogo ug mga anti-crime volunteers maoy nakamatikod sa kadudahan kaayo niining lihok maong ila kining gisitar.

Gikatahong padulong na og saka sa damyo sa MB Leo dihang nakabantay sa mga polis ug nagdali sa pagkanaog apan nakuptan siya sa mga awtoridad. Ang MB Leo nagbiyahe paingon sa Villaba, Leyte gikan sa Bogo.

Dihang gisusi sa metal detector ang bag niini nasutang may dala kining usa ka metal nga butang sa sulod hinungdan ilaha kining gihiling ug diha-diha nakit-an ang lima ka kalibre.45 pistolang paltik nga gituohang gikan sa dakbayan sa Danao ingon man sakuban niini.

 Matud pa niini nga nagdumili sa pagtug-an ang suspetsado kun si kinsa ang iyang hatdan sa maong mga armas sa Villaba, apan nagtuo ang kapulisan nga nagsige na kini’g sakay nga magdala og armas ug bag-uhay lang na diskitaan.

Nagtuo usab silang mga politiko sa probinsya sa Leyte maoy kustomer sa maong lola gumikan kay kusog gyud ang halin sa probinsya sa Leyte sa mga armas gikan sa Danao base usab sa ilang nasayran.

Ang maong lola nga taga dakbayan sa Danao hugot nga mihimakak nga usa siya ka gunrunner ug mitug-an nga mao pa kini ang labing unang higayon nga nagdala og armas.

Mao na kini ang ikaduhang higayon nga may nadakpang babayeng tiguwang sa maong pantalan nga nagdala usab og mga armas padulong sa Leyte, ang unang insidente naglambigit sa usa ka 70-anyos.   (BANAT NEWS)