CEBU - Giaprubahan ni Cebu City Mayor Tomas Osmeña ang P3 milyones “pork barrel” alang sa mga konsehales sa dakbayan.
Kini maoy pahibalo niadtong adlaw’ng Domingo sa mayor atol sa press conference sa Sinulog, si Osmeña mipahibalong duna nay paigong pundo ang dakbayan aron magamit sa mga Sugbuanon.
Ang mayor mipahibalong may surplus nga P250.7 million sa milabay’ng tuig ug ang tanang mga konsehales sa dakbayan magahinan na gyud sa ilang P3 million isip pork barrel.
“They will be like Congressmen, we are delegating them the authority to identify directly the needs of the constituents,” matud pa ni Osmeña.
Kini anha kuhaon sa P160.1 million Local Development Fund (LDF) alang sa tuig 2009.
Si Cebu City Administrator Francisco Fernandez mibutyag nga di lang kini maoy unang higayon nga gihimo sa mayor tungod kay kaniadto pa nitagana na og pundo ang mayor alang sa mga proyekto sa mga konsehal.
Wala hinuon kini magpasabot nga direktang adto mapunta sa mga konsehal ang maong salapi kundili igo ra silang motudlo og usa ka proyekto diin kini gamiton, partikular na niini ang mga imprastraktura sa mga barangay ilawom sa distrito sa mga konsehal.
“This is to make things equitable, duna man gud complaints na there are some councilors getting the bulk of the projects,” sumala pang Fernandez.
Gihangop sa mga konsehal ang maong kalamboan tungod kay magamit kini sa mga tawo.
Si Cebu City South Konsehal Jose Daluz maoy usa sa mga nalipay niini.
“There will be a lot that we can do with the P3 million with the barangays,” ni Daluz pa.
Ang Cebu City Development Council (CCDC) nagproponer og P600 million nga kantidad sa mga proyekto ilawom sa Annual Investment Plan (AIP) apan pilion ra maoy labing importante ug naapil na karon sa P160.1 million.
Kini naglangkob sa mga proyektong gitumbok sa mga barangay kapitan, non-government organizations ug sa mga konsehal sa dakbayan. (Edwin Ian Melecio ug Ferliza Contratista) (BANAT NEWS)