PNP may mga leksyong nakat-unan

CEBU - Dunay mga leksyon nga nakuha ang kapolisan sa pagpatuman sa seguridad sa Sinulog Grand Mardi Gras ug sa Pista Senyor ug naglaraw nga usbon ug palambuon pa kini sa mosunod tuig.

Si Chief Supt. Ronald Roderos, hepe sa PRO-7 atol sa iyang pag-atubang sa mga sakop sa media kagahapong adlawa mipadayag sa iyang kalipay human sa assessment nga nagpakitang malinawon ang Sinulog 2009 nga way bisan unsang naangol.

Matud pa niini nga iyang isugyot ngadto sa Sinulog Foundation nga gikinahanglan ma-improve pa ang grand stand pinaagi sa pagbutang og mga emergency exits, gawas sa naandang mga exit.

Gikinahanglan sad magbutang og mga naka-estambay’ng fire ladder sama sa hagdanan sa bombero aron daling makaagi ang mga tawo kun dunay mga emergency aron malikayan ang stampede.

Hinuon aduna pa silay usa ka tuig sa paghimo’g laing mga lakang nga mas ma-improve ang security arrangements.

Makig-estorya usab siya sa ubang mga opisyal sa Regional Disaster Coordinating Council aron ilang makaestorya ang mga kadagkuan sa Civil Aviation Authority kun nganong ang mga chopper ubos kaayong naglupad.

Matud pa gikinahanglang dunay subayon nga patakaran kun unsa ka gitas-on nga luwas ang mga choppers gumikan sa disgrasya.

Lakip sa ilang usbon sa sunod tuig mao nga usahon nalang ang modala sa command sa security clusters, peace and order, crowd control, nga mao ang Task Force Sinulog Commander kapulisan sa dakbayan sa Sugbu.

Kini tungod kay sa maong kalihukan ang matag cluster gidumala sa CCPO, Central Command ug sa PRO-7 maong di kalikayan nga duna gyuy problemang mitumaw.

Si Roderos milakaw sa carousel route niadtong Domingo sa buntag aron personal nga susihon ang seguridad ug pagkahapon midiretso sa Cebu City Sports Center.

Gipadayag niini nga angayan mahatagan og pasidungog ang tanang unit sa kapulisan nga niabag sa maong kalihukan nga nagpatunhay sa kahapsay ug kalinaw.

Hinungdan nga iya karong gimandoan ang personnel staff niini alang na sa pag-preparar sa maong pasidungog sa mga polis nga nakatampo sa pagbantay sa 2.8 milyones ka mga tawong nisaksi niini.

Hatagan og pasidungog sa Police Regional Office (PRO-7) ang mga sakop sa Task Force Sinulog 2009 pinanguluhan   ni Cebu City Police Office director Patrocinio Comendador gumikan sa kahapsay’g kalinaw sa Sinulog Grand Mardi Gras. (BANAT NEWS)