Municipal hall bldg. sa Consolacion tukoron

Cebu - Gisaad ni Mayor Avelino Gungod sa lungsod sa Consolacion nga bisan krisis ang ekonomiya karong panahona, ipatukod gyud niya ang usa ka bag-ong municipal hall building sa Consolacion.

Si Gungob kinsa anaa na sa katapusang termino sa iyang pangatungdanan isip mayor sa maong lungsod nagkanayon nga kun nahimo niya ang pagpatarok og mga nagkalainlaing mehoras sa lungsod niadtong wala pa siya'y maayong relasyon sa taga Kapitolyo, mas labaw na karon nga may maayo na siyang relasyon tali kang Gobernador Gwendolyn Garcia.

Matud pa ni Gungob nga dili na maihap sa iyang mga tudlo sa kamot ang nagkadaiyang proyekto nga natagamtaman sa taga Consolacion nga walay suporta sa Kapitolyo ug sa Malacañang.

Giangkon ni Gungob nga sukad sa iyang pagpangatungdanan isip mayor sa Consolacion, niining bag-o lang sila si Gobernador Garcia nagkasuod.

Giangkon ni Gungob nga ang managlahi nga partido tali niya ug sa gobernador maoy hinungdan nga wala sila magkasuod sa nanglabay'ng katuigan.

Busa dako siya og pagtuo nga sa dili pa siya mobiya sa iyang katungdanan, wala duhaduha nga ang balor og P200 milyones nga edipisyo sa munisipyo, matukod kini.

Gipasigarbo ni Gungob nga may kaugalingong pundo ang lungsod alang niini ug gipaabot pa niya nga mohinabang ang Kapitolyo niini nga maoy makapahingpit sa katumanan sa maong proyekto. – BANAT NEWS