Gipusposan simod mihuboy

Cebu - Mihuboy ang simod sa usa ka negosyante og baboy human kini bunali og usa ka plastik nga lingkoranan didto sa Quezon Boulevard, Barangay Ermita ning dakbayan sa Sugbu kagahapon sa buntag.

Ang biktima mao si Damaso Minas Cantila, 42, taga sitio Pasong Kabayo, Barangay Duljo Fatima, samtang ang suspek nailhan lang nga usa ka Wendell nga taga Ermita.

Sumala sa kapolisan nga misulod sa usa ka karenderia ang biktima kay moinum og tubig dihang kalit lang miduol ang suspetsado ug sa walay igong hinungdan kalit lang kining gipusposan og bangko nga plastik.

Ang biktima nga wala usab makabantay, maayong pagkaigo sa iyang simod hinungdan nga mihuboy dayon kini mao ra'g paliyang miliki sa ka hinog.

Dihang nakita sa suspek nga mihiwasa ang biktima sa kasuko, nagkasinumbagay sila ug tungod kay gilupig siya(suspek), milanit kini og   kutsilyo hinungdan nga misutoy og dagan ang biktima aron sa pagsalbar sa iyang kinabuhi.

Wala hidakpi sa kapolisan ang suspek. – BANAT NEWS