Ex-Cafgu, laing 1 gipatay atol sa Pista Señor

Cebu - Duha ang patay samtang usa ang naangol sa nahitabong pagpamusil sa Upper Santo Niño barangay Apas ning dakbayan kagahapon pasado alas 5 sa buntag.

Patay diha-diha si Ruel Agcol, 29, samtang namatay usab ang napagang kanhi sakop sa Citizen Armed Forces Geographical Unit (CAFGU) nga si Rodillo Abellar, 31, lumulopyo sa nahisgutang lugar sa dihang kalit nga gipamusil sa suspetsadong si John Lui Suan Caballera, 20, nga taga sitio Mahayahay barangay Apas ning dakbayan.

Naangol usab ang kainom ni Abellar nga si Michael Torno diha sa gawas sa tindahan ni Antonio Villende.

Sa imbestigasyon sa Homicide Section sa Cebu City Police Office nasuta nga nakatulog gikan nag-inom si Agcol sa lantay gawas sa tindahan diin usab mag-inom ang laing duha ka biktima.

Gikatahong miabot si Caballera dayong pusil sa natulog nga si Agcol nga miresulta sa iyang kamatayon, sila si Abellar ug Torno nakugang sa hitabo ug daling nanagan palayo apan giapil sila pagpusil ni Caballera.

Nasayran nga duna pay lima ka mga kauban ang suspek atol sa pagpamusil ug nagdaling nanagan human sa insidente, apan walay swerte si Caballera human kini madakpi sa mga mirespondeng polis.

Nagduda ang kapolisan nga posibleng may kalambigitan sa fraternity ang motibo sa pagpusil patay kang Agcol ug nangapagan ra ang duha. – BANAT NEWS