Cebu - Gibana-banang 2.1 milyones ka tawo ang misaksi sa Sinulog Grand Mardi Gras kagahapon diha palang sa 5.2 kilometrong carousel route sumala pa sa kapolisan, mas daghan kumparar sa milabay'ng tuig.
Si Sr. Supt. Patrocinio Comendador, task force commander seguridad sa Sinulog 2008 mitug-an sa Banat News nga naghuot gyud ang mga tawo diha palang sa carousel route.
Sa contingents pa lang gibana-bana ni Comendador nga moabot og 30 mil ka tawo apil na ang support groups niini. Ang kapolisan mibutang og 2 mil ka mga polis gikan sa CCPO ug support units sa Police Regional Office-7.
“Overall assessment nato is generally peaceful gyud pertaining to the parade,” sumala pa niini.
Gubot
Ag kontrobersyal nga kanhi bodyguard ni kanhi Mayor Alvin Garcia nga si Jonah John Rodriguez pugsanong gipagawas sa VIP room sa CCSC.
Si Cebu City Administrator Francisco Fernandez mikonpirmar nga duna gyu'y komosyon sulod sa VIP room sa dihang ang VIP security nga si Paul Hubahib gikalantugi ni Rodriguez.
Gikatahong namugos si Rodriguez sa pagsulod sa maong lawak ginamit ang usa ka pula nga ID para sa media ug usa ka VIP card nga may pangalan sa kanhi mayor sa dakbayan.
Si Rodriguez gipagawas sa maong lawak ug milahos sa usa ka lokal nga TV station ug mireklamo sa pagtratar kaniya. Sumala pa ni Fernandez may duha ka VIP cards nga gipadala lang sa kanhi mayor, apan walay labot niini si Fernandez.
Wala hinuon matino kung hain makakuha og ‘media’ ID si Fernandez, nga bugtong gitagaan niini mao ra gyud ang mga lehitimong sakop sa media nga mokober diha sa CCSC.
I-Ban
Si Mayor Osmeña maoy unang mihatag og inisyal nga detalye sa maong insidente ug mipadayag og pagdudang posibleng may kalambigitan niini si Gobernador Gwendolyn Garcia.
“It seems that Garcia’s are trying to throw their weight around, the incident is now being investigated and if happens again, I might as well ban the Governor in the next Sinulog, matud pa sa mayor.
Apan dihang gipasabot ang mayor nga wala magkuyog si Rodriguez ug ang gobernador ang mayor mitubag nga pareho ra sila nga grupo.
Kahinumduman nga si Fernandez nakombikto sa kasong libelo sa milabay'ng tuig tungod sa pagpadala og mga malaw-ay'ng text messages sa asawa ni Mayor Tomas Osmeña nga si Margot Osmeña.
Samtang duha ka mga esnatser ang nadakpan sa mga sakop sa Mobile Patrol Group diha sa Palma St. ug laing mangunguot ang nadakpan diha sa CCSC sa sector 7 sa kapolisan.
Pekeng Tiket
Hinuon diha sa Cebu City Sports Complex diin gihimo ang dance contest sa mga contingents may napulo ka mga gidakop tungod sa pagpamaligya og pekeng tikets, ang napulo kasamtangan nang gitanggong sa Parian Police Station, samtang lima sad ka manan-away ang gi-hold sa kapolisan tungod sa pekeng tiket nga ilang gipresentar.
Samtang usa ka sakyanan ang gilungkab diha sa eskina sa Magallanes ug sa MJ Cuenco sa barangay Santo Niño ug nasakiyo ang cellphone, salapi ug bulawang singsing sa usa ka Esterirta Lim.
Laing nakuotan mao si Mel Cary Ruaza kinsa padulong untang managkot sa Basilica del Santo Niño, apan namatikdan nalang niyang wala na sa iyang bulsa ang iyang cellphone nga nagkantidad og P7,500.
Ginukdanay
Nagkaguliyang og kadiyot ang mga tawo sa barangay Carreta dihang nagginukuray ang duha ka pundok sa mga batan-on nga gituohang mga sakop og gangs apan dali ra usab napakgang.
Mao usab ang nasinati sa usa ka Ruel Reyes,48, nga managkot gihapon sa maong simbahan ug nakuhaan og duha ka tseke.
Atol sa parade nagdasok usab ang mga lokal ug langyaw'ng turista pipila kanila ang makitang nagsunod-sunod sa parade ug nanguha og video ug hulagway.
Malinawon
Ang mga fratman usab kagahapon namatikdang malinawon ug mirespeto sa kalihukan samtang nagpundo sa ilang mga naandang mga estambayan sa dalan Jones Avenue.
Usa sa nakapakawat usab og atensyon mao ang mga floats sa mga dagkong kumpanya nga gisakyan sa mga artista sama ni Ann Curtis kansang grupo nanglabay og mga bola, t-shirts ug uban pa nga nakapahugyaw sa mga nanan-aw. – BANAT NEWS