Cebu - Nipasaka og kasong rape sa Provincial Prosecutors Office ang usa ka iyaan batok sa duha niya ka pag-umangkon tungod sa giingong paglugos kaniya sa duha.
Ang 30-anyos nga ginang ug nagpuyo sa usa sa mga sitio sa barangay Calagsaan lungsod sa Argao nipasaka og kasong pagpanglugos batok sa mga pag-umangkon (mga pangalan gitago sa Banat News) niining pulos mga hingkod na ang mga panuigon nga iya rang mga silingan.
Sumala pa sa iyaan nga biktima nga samtang nag-inusara siya sa ilang balay niadtong bulan sa Disyembre tuig 2007, pasado alas 10 ang takna sa gabii, gisampit siya sa usa nga pagawson kay duna kini isulti.
Wala hinuon motugot ang biktima apan nakugang siya dihang kalit kining giguroy ug pugsanong gipasulod sa pansayan gawas sa balay
Diha sa pansayan gihulga siya niining patyon kun mobalibad ug kun mosumbong maong wala siya makasukol dihang gihuboan siya niini ug gilugos.
Sigun pa sa biktima nga dili lang kadto ang unang higayon nga gilugos siya sa suspek tungod kay makadaghang higayon kining gibuhat niini kaniya ug hasta ang manghod niini miapil usab paglugos kaniya.
Ang maong kaso anaa pa karon sa buhatan ni Provincial Prosecutor Jane Petralba.
Samtang laing kasong rape ang gisang-at na ngadto sa korte batok sa usa ka lalaki nga nilugos sa silingang separada diha sa barangay Panadtaran lungsod sa San Fernando.
Ang 36-anyos nga biktima mipasangil sa suspek nga si Richard Bontilao nga milugos kaniya niadtong bulan sa Abril sa milabay’ng tuig samtang silang upat sa iyang mga anak nangatulog.
Sa pamahayag sa biktima, nakamata siya gikan sa pagkatulog dihang may tawong mipugong sa iyang mga kamot, dihang misinggit siya aron magpatabang kalit gisap-ungan sa suspek ang iyang baba ug gilugos.
Matud niya human niini gihulga siyang may dautang mahitabo kanila kun mosumbong, apan iyaha kining gireklamo hinungdan sa pagkasikop sa suspek. – BANAT NEWS