Nadismaya kay wala pasudla sa Devotee City

Cebu - Dismayado ang ubay-ubay nga mga deboto ni Senyor Santo Niño nga gikan pa sa ubang lalawigan tungod kay sa ilang pag-abot sa Devotee City wala nay bakante ug wala sad sila’y kasak-an dinhi sa dakbayan sa Sugbu.

Nasuta nga dunay mga deboto sa Senyor Santo Niño nga wala na pasudla sa Devotees City kagahapon sa buntag diha sa kilid sa Fort San Pedro sa mga nagdumala niini.

Gihimong rason sa mga tinugyanan sa Devotees City mao usab ang giingong naghinobra na sa mga okupante sa mga 72 ka mga container vans nga maoy gihimong temporaryong kapuy-an sa mga bisita nga nangiyawat sa ilang budget.

Apan nagkuwang ang mga van tungod usab sa ubay-ubay nga mga deboto nga unang nangabot ug unang nagparehistro.

Gani ang kagamhanan sa dakbayan nidugang pa og pipila ka mga tent nga maoy gipapasilungan sa ubang mga deboto o bisita.

Ang nagdumala sa Devotee City nakarekord og 2,062 ka mga tawo wala pay labot niini ang wala pa ma-encode sa computer nga mas taas itandi sa mga namuyo sa Devotees City atol sa piyesta Senyor sa miaging tuig nga duna lay 2,022 ka individual.

Gipasabot hinoon sa chairman sa Devotees City Accommodation nga si Konsehal Edwin Jagmoc nga first-come first-serve ang ilang pagdawat sa mga bisita.

Apan karon pa lang nagplano na ang konsehal sa angayan nilang himuon sunod tuig aron ma-accommodate ang tanang mga bisita gikan sa ubang lalawigan.

Usa sa gikunsiderar ni Jagmoc mao ang pagpangita og laing dapit nga hamugaway ug mabutangan sa mas daghang mga container vans.

Ang kalisod sa panahon maoy usa sa gituohan sa konsehal nga hinungdan nga nagsugwak ang gustong mopahiluna diha sa Devotees City niining tuiga tungod kay gawas nga libre ang pagpuyo sa mga deboto, dunay pipila usab ka mga sponsors nga mohatag kanila og libreng mga pagkaon.

Hinuon ugma na lang kutob ang gitugot sa kagamhanan sa dakbayan pagpapuyo kanila diha sa Devotees City ug hipuson na usab ang mga vans ug tents. – BANAT NEWS