Politika sa Tudela migrabe

CEBU - Wala pa gihapon hingpit mahunong ang kagubot sa politika diha sa lungsod sa Tudela human ang mga suporters ni Mayor Rogelio Bacquerfo gipasanginlang namusil sa suporters usab sa kaatbang niining si Mayor Demetrio Granada kagahapon sa kaadlawon.Gimando na sa pangulo sa Cebu Provincial Police Office Sr. Supt. Carmelo Valmoria ang imbestigasyon sa pagpamusil diha sa barangay Southern Poblacion sa maong lungsod nga miresulta sa pagkasikop sa mga suspek.

Ang nangadakpan mao sila si Ricky Ople, 24, taga barangay Mc Arthur sa maong lungsod ug Resty Casun, 27, nga usa ka job-order.

Ang mga supporters ni Granada giilang sila si Joel Loon, 37, Cresencio Largo, 43, Jedel Goc-ong, 35, ug Benjie Argamedo, 20, wala hinuoy nangaigo kanila tungod kay human makabuto makausa miungot ang armas.

Si Valmoria nagkanayon nga si Sr. Insp. Ramon Villar ang hepe sa Tudela Police Station nga nanabo sa baybayon ang mga biktima dihang kalit lang gipaarakan og Ingram automatic pistol ni Casun.

Apan human sa unang pagbuto miungot ang armas ug nahitabo na ang kagubot, diha-diha miikyas si Casun ug gibilin ang armas kang Ople, si Ople naabtan sa mga tawo ug mga polis diha sa duol.

Matud pa ni Valmoria nga dunay nakakita nga didto nidagan sa munisipyo si Casun ug nisulod sa buhatan ni Bacquerfo hinungdan nga gipangunayan ni Villar sa pagsuhid ang opisina sa mayor apan wala kini didto. (BANAT NEWS)