Fluvial Padayon

CEBU - Gipaabot nga hugopan sa liboan mga debotos ni Sr. Sto. Niño ang fluvial procession nga ipahigayon karung buntag paghatud og balik sa imahen sa Balaang Bata gikan sa Saint Joseph Parish Church sa dakbayan sa Mandaue nga manukad sa Ouano Wharf agi sa kadagatan paingon sa Pier-1 dinhi sa siyudad sa Sugbo aron dad-on og balik sa Basilica del Sto. Niño.

Sa paghapon himuon dayon ang solemne nga prosesyon gikan sa Basilica paingon sa rota nga mas taas karon itandi sa miaging tuig.

Apan gihulagway sa mga tinugyanan sa Philippine Coast Guard nga tungod sa dili maayong kahimtang sa panahon mas menus ra ang mga sakyanan sa kadagatan ang nagparehistro nga mosalmot sa fluvial procession.

Gibutyag ni Chief Petty Officer Virgilio Tibayan sa Cebu Coast Guard dihang nahinabi sa Banat News alas 7:00 karung buntag mogikan ang fluvial procession sa Ouano wharf ug naka-schedule kini nga modunggo sa Pier-1 sa dakbayan sa Sugbo sa alas 9:00 sa buntag aron ibalik sa Basilica del Sto. Niño.

Base sa listahan sa nagparehistrong mga sakyanan sa dagat niabot lang kini og 83 ka mga dagko ug gagmay ang pormal nga nakaparehistro aron mosalmot sa maong fluvial procession.

Kini gilangkuban sa tulo ka dibisyon diin ang sa division-1 dunay 27 nga nagparehistro nga gilangkuban sa mga conventional vessel nga dunay gibug-aton nga 15 gross tonnage pataas.

Sa division-2, dunay 42 ka buok nga gilangkoban sa mga barko nga dunay gibug-aton nga 3 gross tonnage ngadto sa 15 gross tonnage samtang sa division-3, 14 ka buok ang mipatala nga may 3 gross tonnage paubos nga gibug-aton kun kadto lang mga gagmay nga sakyanan sa dagat sama sa mga pumpboat.

Matud ni Tibayan nga tungod sa dili maayong kahimtang sa panahon nga pagkusog sa hangin ug pagdagku sa bawod gamay ra ang mga gagmay nga sakyanan sa dagat kon mga pumpboat ang nagparehistro nga mokuyog sa fluvial procession sukwahi sa nilabay'ng tuig nga maoy labing daghan og niabot ang tanang nagparehistro og 111 ka buok.

Hinuon giklaro ni Tibayan nga giobligar gyud ang tanang mga mosakay sa maong mga barko o pumpboat sa fluvial procession pagsul-ob og life jacket isip proteksiyon kun dunay kakulian nga mahitabo.

Nunot niini gipasalig ni Tibayan nga andam na ang tanan sa maong fluvial procession apil na ang paghigpit sa seguridad, dunay tulo ka patrol boat sa Philippine Navy nga mobantay wala pay labot sa marshals sa Coast Guard ingon man mga rubber boats. (BANAT NEWS)