Petisyon sa IBP gibasura

CEBU - Gibasura sa korte ang gipangayong Temporary Restraining Order (TRO) sa mga sakop sa Integrated Bar of the Philippines (IBP) batok sa mga opisyales sa Kapitolyo aron pagpahunong na sa pangolekta og parking fee ug pagtangtang sa camera nga anaa sa sulod sa Capitol compound.

 Si RTC 7 branch 17 Judge Silvestre Maamo Jr. nagkanayon nga mas bug-at ang gihatag nga rason sa mga abogado ni Governor Gwen Garcia, Capitol consultant on Security matter Byron Garcia ug uban pang mga opisyales sa Capitol.

 Ang huwes nagkanayon nga adunay gahum ang usa ka Local Government Unit sa pag-imponer og buluhisan sa Capitol compound tungod kay ang maong luna gipanag-iya man sa kagamhanan sa probinsiya.

Walay nakita ang korte nga kalapasan sa pagbutang og camera sa compound sa Kapitolyo tungod kay seguridad man ang katuyoan sa maong butang ug dili sa kadautan sa mga abogado.

Sa habig sa kagamhanan sa lalawigan sa Sugbu, gikalipay pag-ayo ni Governor Gwen Garcia ang resulta sa maong kaso tungod kay nagpakita lamang kini nga legal ang ilang gihimong mga lakang.   (BANAT NEWS)