CEBU - Tulo ka nagpailang sakop sa New Peoples Amy (NPA) ang nangilkil og P40 mil sa usa ka negosyante diha sa sitio Emo, barangay Cawrasan lungsod sa Carmen.
Ang maong insidente nahitabo niadto pang Enero 6 sa alas 6:30 sa gabii apan bag-uhay pa lang na-report sa kapulisan sa Carmen diha sa Operation sa Cebu Provincial Police Office.
Usa ka Apolinar Davedon, negosyante, maoy nabiktima sa tulo ka nagpailang NPA nga nangangkong sakop sa usa ka kumander “Cobra”.
Base sa report nila ni Police Sr. Insp. Carlos Reyes Jr., hepe sa Carmen Police Station ang mga nagpailang NPA unang nidemanda og kwarta kang Davedon niadtong Disyembre 20 sa niaging tuig ug P40 mil pinaagi sa suwat.
Ang maong kwarta adto ipabutang sa ubos sa punoan sa lubi duol sa panimalay sa ginganlan lang og “Sidoy” apan gibalewala kini sa negosyante hinungdan nga giusban siya og pangayo niadtong petsa 6 ning bulana alas 6:30 sa gabii sa usa ka tawong nag-bonnet nga misaka sa iyang panimalay.
Gumikan sa kahadlok niini napugos sa paghatag sa iyang P14 nga cash ug human mahatag ang kwarta daling nisibat ang mga lalaki.
Hinuon ang maong insidente na-report sa biktima sa 12th Infantry Battalion ug 3rd Infantry Battalion nga nagbase sa nahisgutang lugar. (BANAT NEWS)