Balay patigayon inspeksyunon sa City BFP

CEBU - Sugdan karong adlawa sa Cebu City Fire Department ang pagpahigayon og inspeksyon ngadto sa mga balay patigayon sa dakbayan sumala pa ni City Fire Marshall Superintendent Ismael Codilla subay usab sa kamanduan ni acting mayor Michael Rama.

Matud ni Codilla nga ang ilang unahon sa pagsusi mao ang mga dagkong establisamento sa siyudad sama sa mga mall ug uban pa aron pagsusi kun padayon silang nagsunod sa fire code.

 “Tan-awon namo ilang arrangement dili ba obstruction o gi-lock ba ang fire exits, mag-usab-usab man gud na sila, tan-awon sab namo ilang fire protection system,” sumala ni Codilla.

Una nang gimanduan ni Rama ang kabomberuhan sa dakbayan nga sirad-an ang mga balay patigayon nga delikado sa sunog.

Sa pikas bahin gihangop ni Codilla ang bag-ong balaud nga bag-o lang usab nga gipirmahan ni Presidente Gloria Macapagal Arroyo nga mao ang Akta Republika 9514 kon ang Fire Code of the Philippines of 2008 nga nag-repeal sa 31 ka tuig nang fire code sa nasod.

Matud ni Codilla nga bisan og naghatag kanila og dakong responsibilidad ang bag-ong balaud kini magpahamtang usab og bug-at nga silot sa mga malapasong establisamento.

Usa ka probisyon niini magpahamtang og multa nga moabot sa P100 mil niadtong makalapas sa fire code gawas sa pipila ka tuig nga pagkabilanggo.

Mas delikado hinoon sa mga bombero ang maong balaud tungod kay kini mahimong mataktak sa serbisyo gawas nga makamulta ug mabilanggo kun mapamatud-ang nakahimo og kalapasan sama sa pagpabaya sa katungdanan ug uban pa.   (BANAT NEWS)