Lima sikop sa FISECA

CEBU - Lima ka tawo lakip na niini ang usa ka menor de edad ang nasikop sa mga sakop sa Sea Fishermen Ecological Care (FISECA) niadtong Miyerkules sa buntag tungod sa ilang pagpanagat diha sa Lagundi Reef nga usa ka protected fish sanctuary sa habig sa sitio Litmon barangay Poblacion, dakbayan sa Talisay.

Ang mga nasikop mao sila si Christian Pagudon, 38, Darryl Pagudon, 31, Rodolfo Pacaña, 40 ug Pedro Romero, 30, pulos mga residente sa sitio Litmon, ug usa ka 15-anyos nga batang lalaki

Base sa imbestigasyon sa kapolisan nga ang nahisgutang lima ka mga suspetsado nasigpatan sa nagpatrolyang mga sakop sa FISECA nga sila si Oliver Rodriguez, Charlon Domingo, Salvador Montaño Jr. ug Robery Baguio samtang misuway og pangisda sa maong fish sanctuary.

Ang nahisgutang mga mananagat misuway sa pag-ipsot dihang miduol ang mga sakop sa FISECA ngadto kanila apan nababagan ang pumpboat nga ilang gisakyan.

Ang mga sakay sa nahisgutang pumpboat milayat ngadto sa dagat aron unta sa paglikay sa mga awtoridad apan nangadakpan sila tagsa-tagsa ug nadala sa baybayon.

Ang pumpboat nga gisakyan sa maong mananagat, napulo ka pasol, usa ka bugsay ug usa ka parisan sa panyapak ang gisakmit sa Fiseca, nasuta nga wala diay silay permiso sa pagpanagat.

Ang maong mananagat ang gibuhian usab human kini makalukat og permit sa ilang panagatan.   (BANAT NEWS)