CEBU - Temporaryong sirad-an ug balhinon ang Cebu South Bus Terminal sa tibuok adlaw karung Domingo atol sa pagpahigayon sa Sinulog Mardi Gras gikan sa alas 6 sa buntag hangtud na sa hapon.
Gibutyag ni Eva Encabo ang acting chief collection officer sa Cebu South Bus Terminal dihang nahinabi sa Banat News nga temporaryong balhinon ang terminal karung Domingo sa South Road Property (SRP) aron adto magkarga ug diskarga og pasahero.
Kini maglangkob sa mga minibus ug V-hires nga nagbiyahian paingon sa habagatang bahin sa probinsya.
Matud ni Encabo moliko inig abot sa Mambaling Access Road ang mga bus lahos na sa SRP ug gikan didto dunay mga PUJ nga temporaryo usab nga mamasahero sa maong adlaw sa SRP aron maoy mohakot sa mga pasahero paingon sa dakbayan.
Tumong niini aron mapamenus ang kahuot sa trapiko sa tibuok siyudad sa Sugbo atol sa maong adlaw ilabina diha sa may dalan Natalio Bacalso Ave. paingon sa South Bus Terminal nga dili layo sa Cebu City Sports Center diin matapos ang Grand Mardi Gras.
Hinuon giklaro ni Encabo nga sa tibuok adlaw lang sa Domingo atol sa Sinulog ang maong pagsirado sa South Bus terminal ug mobalik na sa normal ang operasyon niini inig adlaw’ng Lunes. (BANAT NEWS)