Cebu - Miusab sa iyang giluwatang pamahayag ang basurero nga nakakita sa $60 mil diha sa Inayawan Sanitary Landfill sa sayong bahin niadtong buwan sa Disyembre.
Si Napoleon Alburo mibalik sa sibyaanang DyHP-RMN-Cebu kagahapong adlawa ug mihimakak sa tanan niyang gibutyag sa kahanginan kaniadto.
Kung mahinumduman, si Alburo unang mipatim-aw sa nahisgutang sibyaanan human sa usa ka semanang pagtago-tago uban sa iyang pamilya sa lungsod sa Argao.
Kini dihang nabalisa ug nahadlok human gikataho nga siya gipangita sa National Bureau of Investigation (NBI-7) nga maoy gidangpan sa tag-iya sa mga dolyares.
Unang gipadayag ni Alburo nga daghan ang nakakuha sa maong kwarta sa dihang siya gitapuk-an sa kauban niyang mga basurero.
Apan kagahapong adlawa nausab ang tonada ni Alburo ug iyang giangkon nga siya ra ang nakakita ug nakadala sa mga dolyares.
Matud sa basurero nga ang kwarta iya hinuong gitugyan ug gipahipos sa iyang igsuong si Julie Lampitao dayong sibat ngadto sa lungsod sa Argao.
Apan si Lampitao giingong mitugyan usab sa parte sa mga dolyares ngadto sa ilang ig-agaw nga si Vicky Candido sa dihang nakalarga na si Alburo.
Sa Dihang gipangita na sa tag-iya ang nalabay nga mga dolyares uban sa NBI-7, giuli nila ni Lampitao ug Candido ang ubang dolyares.
Apan mokapin lang sa $20 mil dolyares ang gihatod nilang Candido ug Lampitao hinungdan nga ang basurero nangita sa iyang bahin sa nahabilin.
Giasoy ni Alburo nga moabot lang sa P20 mil ang gihatag ni Candido kaniya lakip na sa mga appliances, samtang P6 mil ra usab ang nahatag sa iyang igsuon nga si Lampitao.
Butang nga dili madawat ni Alburo tungod kay giingong si Candido nakapatukod na og piggery, internet café gawas sa pagpalit og mga appliances.
Gusto sa basurero nga magpatabang sa DyHP-RMN Cebu nga mahatagan ug makuha ang klaro niyang bahin sa nahabiling mga dolyares.
Apan ang pipila ka anchorperson nga gihinabi ni Alburo nagduha-duha na pagtabang niini tungod sa iyang gihimo nga pagpamakak kaniadto. – BANAT NEWS