Koreano Mobubo og negosyo sa Cordova

Cebu - Buhong sa mga Koreyanong investors ang lungsod sa Cordova karong tuiga human sa gihimong Memorandum of Understanding kon MOU sa mga Koreyano ug kagamhanang lokal sa lungsod sa milabay’ng adlaw.

Ang "signing of contract of investments" gihimo sa Waterfront Hotel Lahug tali sa Zan Hai International Trade, Ltd. usa ka Korean based trader nga girepresentahan sa CEO niini nga si Ji Young Mo, Cordova Development Committee uban sa CEO nga si Bong Huan "Charlie" Cho ug sa kagamhanang lokal sa lungsod sa Cordova pinangulohan ni Cordova Mayor Adelino Sitoy ug mga konsehales.

Ang maong kalihukan gisaksihan sa Chairman sa Korean Association of Cebu nga si Chun Kyung Chul ug ang Presidente niini nga si Yang Bin Yung.

Atol sa maong pinirmahay gipasalig ni Ji sa Zan Hai International Trade, LTD nga sila mohimo og mga paagi didto sa Korea nga makadani og mga investors nga mobubo og puhonan sa lungsod sama sa ilang gihimo sa nasud sa China, Taiwan ug Thailand.

Gani ning panahona aduna nay gihimong ‘global golf course’ nga maghatag og mga bag-ong teknolohiyang kagamitan sa maong duwa ang mga Koreyano, ang bag-ong International School sa Cordova nga gitawag nila og Overseas School ug mga de-kalidad nga subdivisions.

 Lakip sa plano mao ang pagtukod og modernong tambalanan, pabrika sa medical equipment ug uban pang mga negosyo.

Matud pa ni Cho kini monitoron sa CDC ang dagan sa maong proyekto ug ingon man suportahan kini sa mga gikinahanglanon.

Gumikan niini dako ang kalipay ni Sitoy tungod kay makapalambo kini sa iyang lungsod ug makatabang sa mga molupyo sa panarbaho. – BANAT NEWS