Opisina sa Philippine State ugdaw

Cebu - Naugdaw ang opisina sa Philippine State (usa ka subdivision developer) nga anaa sa Pacific Grand Villas sa Barangay Marigondon dakbayan sa Lapulapu kagahapon sa kadlawon.

Sa imbestigasyon nga gihimo ni SFO1 Atilano Berido sa kabomberohan sa dakbayan sa Lapulapu nasuta nga usa ka electrical short circuit ang hinungdan sa maong sunog diin dali nga gidakop sa kayo ang mga pinundok nga mga lata sa pintal, thinner ug uban pang matang sa kemikal para sa konstruksyon.

Matud pa ni Luis Manching ang gwardiya sa maong buhatan nga sa mga alas 5:00 kagahapon sa buntag kalit lamang napawong ang kuryente sa ilang palibot ug abi niya og nag-brownout lang .

Apan sa pagtan-aw pa niya sa ubos nga bahin sa ilang opisina misilaob na ang kayo uban sa mga butobuto nga iyang nabati.

Nangayo dayon siya og panabang sa ubang guwardiya sa subdivision sa pagtawag og bombero samtang naningkamot usab siya sa pagpawong sa kayo.

Apan ulahi na ang tanan sa pag-abot sa mga bombero kay hingpit nang naugdaw ang tibuok edipisyo.

Hinuon walay gikatahong naangol ug nakalas sa maong sunog ug ang katibuk-ang kadaot gibanabana nga mikabat og P350,000.

Ang maong sunog nga gibutang sa third alarm nagsugod sa alas 5:10 sa buntag ug napawong human sa 2 minutos nga wala makakatap sa silingang panimalay. – BANAT NEWS