Socialized housing gigahina'g P1 bilyon

Cebu - May P1 bilyon nga salapi ang gigahin sa socialized housing program sa kagamhanan sa nasud alang sa mga molupyong kabus nga sakop sa urban poor organization .

Si Randy Librando, manager sa Socialized Housing Finance Corporation mibutyag niini atol sa iyang pagpakigtagbo sa kagatosan ka mga molupyo sa Villa San Lorenzo Ruiz Subdivision sa Riverside sa barangay Canduman sa dakbayan sa Mandaue niadtong miaging adlaw.

Mibutyag usab siya sa Banat News nga ang maong gahin nga salapi anha ipaagi sa National Housing Authority (NHA), Socialized Housing Finance Corporation, ug uban pa nga maoy gitahasan aron pagsuperbisar sa mga tukorong panimalay pinaagi sa socialized housing program sa gobyerno.

Dugang pa ni Librando nga gitinguha sa ilang buhatan nga madali ang pagpatuman sa maong programa apan mag-agad usab kini sa mga dokumentong iduso ngadto sa ilang buhatan gikan sa mga kahugpongan sa urban poor.

Gipasabot ni Librando nga ang mga kahugpongan sa urban poor gikinahanglan nga mosandig sa mga project coordinator sama sa mga Non Government Organization (NGO) o Local Government Unit (LGU).

Si Librando miingon nga ang programa sa kagamhanan sa paghatag og kaugalingong luna sa mga kabus nga katarokan sa ilang balay gihan-ay na daan pinaagi sa data-datang bayad niini sa tag P500 ang buwan sulod sa 25 ka tuig. – BANAT NEWS