Talisay VM Abarquez mo-resign

Cebu - Si Bise Mayor Lani Abarquez sa dakbayan sa Talisay kinsa nadismaya sa isyu bahin sa “corruption” nga gihimo sa pipila ka kawani sa dakbayan, malagmit moluwat sa iyang katungdanan tungod sa iyang panglawas.

Gani gitakda siyang molarga karong Biyernes ngadto sa Melbourne, Australia aron magpakasal sa iyang uyab didto.

Kagahapon sa buntag nanghatag na siya og imbitasyon ngadto sa mga opisyal ug kawani sa Talisay City Hall alang sa iyang kasal.

Si Abarquez kinsa nagpanuigon na og 39, mo-resign na sa iyang posisyon apan sa pagkakaron mi-file lang una siya og leave of absense sugod niadtong Enero 5, 2009.

Hinuon misaad siyang mobalik og report sa trabaho unya sa Marso 16, 2009 human sa iyang kasal kang Engineer Victor Alcoseba nga usa ka Talisaynon nga atua karon magbase sa Australia karong Marso 8.

Gawas sa taga Talisay gipadad-an usab niya og imbitasyon si Gobernador Gwen Garcia ug uban pang suod niyang mga opisyal sa Kapitolyo.

Ang mohulip sa iyang puwesto mao si konsehal Alan Bucao kinsa maoy nag-unang konsehal sa dakbayan sa Talisay.

Mahinumdoman nga nadismaya kaayo ang bise mayor gumikan sa nadiskobrehan niyang kahiwian sa pipila ka mga kawani kinsa mipaburot sa presyo sa mga pinalit nga butang para sa City Hall. Ug Rey Pasaporte (BANAT NEWS)