TF Red Plate sa Ombudsman magpadayon

Cebu - Nipasidaan ang buhatan sa Ombudsman Visayas sa lokal nga mga opisyales dinhi sa Sugbu nga magpadayon ang ilang pagmonitor sa mga sakyanan sa gobiyerno nga gamitong personal sa mga kawani bisan paman sa selebrasyon sa Sinulog.

Lakip sa tutukan unya sa Task Force Red Plates ang mga sakyanang gamiton sa mga contingents ug opisyales sa gobiyerno nga mosalmot sa Sinulog Grand Mardi Gras.

Matud pa ni Deputy Ombudsman for the Visayas Pelagio Apostol dili exempted ang kasaulogan sa kapistahan sa Sr. Santo Niño sa ilang kampanya batok sa pagpasagad og gamit sa mga sakyanan sa gobiyerno.

Si Apostol nagkanayon nga si bisan kinsang mga opisyales o kaha mga kawani sa gobiyernong masakpan nga mogamit niini nga walay pagtugot sa labaw nga opisyal pasakaan og kasong serious dishonesty.

Sa higayon nga mamatud-ang sad-an silotan kini og usa ka bulan ngadto sa unom ka bulan nga suspension nga walay suweldo nga madawat.

Gitataw hinuon ni Apostol nga kun may trip ticket o ba kaha mangunay mismo ang labaw’ng opisyal sa usa ka government agency dili na kini lisud-lisoron.

Misabot hinuon siya sa social responsibility sa usa ka opisyales kansang mga sakop miapil sa Sinulog Mardi Gras hinungdan nga dili nila kini lisudlisuron basta tumanon lamang ang tukmang lagda sa paggamit sa sakyanan ug dili abusohan. – BANAT NEWS