Rerouting sa Mandaue alang sa 'Tagbo' himuon

Cebu - Dunay himuong rerouting sa mga rota sa mga sakyanan sa dakbayan sa Mandaue karong Huwebes ug Biyernes alang sa “Tagbo sa Balaang Pamilya” ug sa umaabot nga pista sa Senyor Santo Niño.

Si Traffic Enforcement Agency of Mandaue (TEAM) administrative officer Domingo Cortes, nga nahinabi sa Banat News nagkanayon nga Huwebes sa hapon sugdan ang rerouting ug did-an nang makaagi ang mga motorista sa National Shrine of Saint Joseph sa barangay Centro sa maong dakbayan.

Dunay himuong prosesyon nianang taknaa sa   imahen ni Senyor San Jose, imahen ni Birhen Maria ug Senyor Santo Niño alang sa kalihokan nga Tagbo sa Pamilya.

Si Cortes miingon nga sa maong higayon tak-opan usab ang dalan S.B. Cabahug paingon sa merkado publiko, A. del Rosario, Catalino C. Ouano ug S.B. Cabahug Extension sa barangay Centro.

Ang pagsugat sa tulo ka imahen anha mahitabo sa city health, S.B. Cabahug Extention sa Tribunal, Centro, S. B. Cabahug sa Ibabao ug A. del Rosario sa barangay Mantuyong sa maong dakbayan.

Ang tulo ka mga imahen nga iprosesyon pangadto sa simbahan ni Saint Joseph sa barangay Centro nga kuyogan sa liboang mga deboto.

Matud pa ni Cortes nga atol sa maong kalihokan walay sakyanan nga paagion sa mga dalan nga nagpaingon sa kinapusoran sa dakbayan hangtud na sa adlaw’ng Biyernes.

Hinuon si Cortes miingon nga mahibalik ang normal nga rota sa higayon nga matapos na ang maong mga kalihokan. – BANAT NEWS