CEBU - Gipatay nga piskal nga si Patrick Ian Osorio gikatahong gipadalhan og mga bala niadtong Disyembre 25 sa miaging tuig diha sa panimalay niini sa barangay Cawayan lungsod sa Dalaguete base sa imbestigasyon.
Si Osorio gibanhigan patay sa miaging semana diha sa Gochan St., barangay Mambaling ning dakbayan sa Sugbu ug gisusi na karon kung may relasyon ba kini sa kamatayon sa piskal.
Si Sr. Supt. Patrocinio Comendador ang Task Force Commander sa Task Force Osorio mitug-an sa mga sakop sa media nga dunay report nga nakadawat og regalong mga bala sa .9mm caliber si Osorio, hinuon .45 kalibre basiyo sa bala ang nakit-an diha sa crime scene atol sa ambush.
Nasayran hinuon sa kapolisan gikan sa amahan ni Osorio nga si Atty. Jesus Osorio Sr. nga duna gyuy .9mm nga armas ang iyang anak ug nagtuong regalo ra gyud ang maong mga bala.
Apan bisan paman niini giapil na kini karon sa mga gisusi sa TF Osorio tungod kay way suwat nga gipasupot kung diin gikan ang maong mga bala.
Kagahapong adlawa pormal na usab nga gipagawas sa kapulisan ang cartographic sketch sa duha ka mamumuno ni Osorio apan sahi sa ubang mga cartographic sketch di maklaro ang mga nawong sa mga suspek tungod kay sila pulos nag full-faced helmet.
Sumala pa sa kapolisan naglisod sila pagkuha sa dagway sa duha tungod kay nag-helmet sila apan malaumong pinaagi sa maong sketch dunay makahinumdom nga nakakita kanila atol sa maong adlaw.
Apan sa usa ka di kumpirmadong report, usa ka giingong sakop sa Tau Gamma Fraternity nga gituuhang maoy ‘trigger man’ sa ambush ug gikatahong anaa karon sa kustodiya sa kapolisan sukad pa niadtong adlaw'ng Sabado human kini madakpi diha sa sitio Bulingit.
Ang maong lalaki tag-iya og motorsiklong pula sumala pa sa mga silingan bag-uhay lang giilisan og pintal nga itom.
Samtang ang usa sa duha ka mga testigos gikatahong midangop sa radio station dyHP aron magpatambag sa station manager nga si Atty. Ruphil Bañoc tungod sa giingong pagpugos pagpapirma kaniya og affidavit nga magtumbok sa maong tawo nga mao ang gunman.
Ang maong testigo nabalaka sa iyang gipirmahan tungod kay wala gyud siya makakita sa dagway sa gunmen gawas lang sa mga tawong nagsuot og full-faced helmet ug ang nagkadugong si Osorio. (BANAT NEWS)